Кердача дешара шера, вай унахцӀенон Министерствонна бакъахьа хетар
Дешара шу дӀадоладалар - из берашта массехк мухь тӀабужаш дола хьал да, къаьстта букътӀехка. Цунца дувзаденна, унахцӀенон Министерсвос берашта долча новкъостала шийна бакъахьа хетар белгалду, деза тӀормигаш букъ тӀа леладеш хилар царна Ӏаткъаш хургдоацаш, из бахьан букътӀехк гоама хургйоацаш.
«Букъ тӀабаьккха лелар, дукхагӀча берий долаш да. Сахьаташ доахаш парта тӀа багӀар, деза тӀормигаш леладе дезар, букъ нийса ца лелабар - цу дерригне а букъ цамогаш бу: лазар ду, букътӀехк нийса хилац, кадай хилар дӀадоал. Цудухьа хӀанззе а оарцагӀбовла беза цу гӀулакха.
Ӏомаде бер нийса дагӀа, букъ нийса лоаттабе, букъ тӀабаьккха ца хилийта. Дицдеш ма хила, букъ нийса лелабар-из, хоза хиларал совгӀа, могашала а эшаш да.
Дӏаходар - тӀормиг нийса хилар. Ишколе хьош бола тӀормиг беза боацаш а лелабеш атта а хила беза, тӀехкар шера долаш, букъ нийса дӀалоацаш. Беро тӀормиг нийса лелабой хьожаш хила, цхьан оагӀорахьа мухь ма хилийта.
Бер деша дагӀаш йолча моттиге а шедар лертӀа хила деза: нийса истол, гӀанд, нийса сердал.
Берий букъ нийса хургболаш, физически къахьега деза царца.
Дицдеш ма хила, букътӀехк нийса хилар - из бера могашал я. Зӏамига болча хана денз Ӏомабе, тӀаккха уж хьалкхувргба могаш, низ болаш», - аьлар, шоашта бакъахьа хетар дувцаш, «Сердало» газетага ГӏалгӀайчен унахцӀенон Министерстве.
