Гӏалгӏайчен пхьараш ӏомалуш ба, гранташ йоаха проекташ оттае
Гӏалгӏайчен пхьараш ӏомалуш ба «Са бизнес» яхача лоархӏамеча кхетачене гранташ йоаха проекташ язъе, яхаш, хоам бу «Сердало» газетага из болх вӏашагӏбеллараша.
«Тайп-тайпарча говзанчашта, кулгаговзала балхаш леладерашта хоадам болаш довзийтар федеральни грантови яхьашка дакъа лацара дола хьалаш. Центра болхоша дийцар, 2026 шера хила йиш йолча федеральни грантий яхьех, (цу юкъе президентски грантех, Минэкономдегӏахара грантех, культуран ганза балхах) иштта проект хьакхолларах: технико-экономически кӏийленгара вахарерча пайданга кхаччалца.
Говзанчаша иштта теркам тӏабахийтар, эггара чӏоагӏагӏа дола дехар яздеш а, гӏалаташ юкъедитар бахьан долаш, ахча ца луш диса хилар. Цул совгӏа, «Са бизнес» яхача центра ше кийча хиларах аьлар дӏахо дехар язде ӏомабеш дола хьехамаш дала», - аьлар хоамо.
«Кулгаговзал – из духхьал ӏадаташ дийца ӏеш дола хьал дац. Вайна гуш да вай начӏал долча наьха йоккха таро хилар: топпарах, дахчах гӏирсаш дар; къаман тӏабувхабу гӏирс тегар; дошо, дото хӏамаш хьаяр. Хӏанз декхар - цу наьха лаьрххӏача боарам тӏа бала, гранта гӏирсашца новкъостал дар. Оаха кхетаду уж балхаш хьакхоллаш дукха таро а низ а дӏабода, бакъда из арахецара йоккхий таронаш эш», - аьлар «Са бизнес» яхача Центра зарбан болх лелабеча Мартазанаькъан Изабеллас.
