«Вахара Ӏалашду моттигаш» яха къаман проект я республике кхоачашъеш
Россе Президента юкъеяха «Вахар Ӏалашду моттигаш» яха къаман проект я ер шу доладелча денз вай мехка йоаржаеш. Наьха вахара хьал аттача доаккхаш, тоадеш болх ба проекто бер. Эггара керттерчарех да, тайп-тайпарча лоархӀамеча моттигашта тӀадолхаш долча наькъий хьал тоадар. Из хоам «Сердалога» бир Мехкадаь зарбан болх лелабераша.
«БӀаьстан хьалхара бутт юкъекхаьчача хана, тоабаь хила безаш да «Наьсаре-Юкъера Ачалкхе» яхача наькъа цхьа дакъа. 2,2 км кхоачаш хургба кердача хьала тӀа боалабаь никъ. Белгалде деза, из никъ Наьсарен-Шахьара поликлиника, № 2 йолча берий беша тӀабодаш болга. Из никъ тоабар чӀоагӀа лоархӀаме да, хӀана аьлча, кӀалхара никъ тишбенна, тоабе безача хьале кхаьча дикка ха я. Цу гӀулакхо хало йора машинашта, гӀаш леларашта», - йоах хоамо. Бахархоша из моттиг тоае яхаш дехар ду дукха ха яр.
Кердача хьисапе тоабаьча наькъа хьал хьалха санна кхерам болаш хургдац. Белгалде деза, из проект тахан къаман боккха аьттув луш, беркате хиннилга. Къаман проектага гӀолла укх шера тоаде лерхӀ 41,5 км кхоачаш бола 11 никъ. Цу гӀулакхо хьагойт, наькъаш тоадара болх тӀатеӀӀа дӀахьош а дӀахьоргболаш а болга.
