Салоӏа денош хьаоттарга хьежжа, берашта терко лоаттае еза
Унахцӏенон гӏулакхех йолча мехкарча министерствон хьалха латтача Ӏалбаканаькъан Зарас дешара цӏагӏа сайца бераш лорадара болх геттара чӏоагӏбара тӏехьех даьй, ноаной. Из хоам «Сердалога» бир министерстве. Бераш лорадара Халкъашта юкъерча Денца дувзадаь къамаьл деш, министра белгалдир, берий салоӏа денош дӏадолалуш дола ди из долга. Дешара паргӏата болча хана къаьстта чӏоагӏа тӏахьожам лоаттабе беза къонабарашта.
«Ахкан салоӏаш дола денош хьаоттар хӏара бера дегагӏоз я. Паргӏата ха шортта я царга хӏанз, цунга хьежжа доал доацаш бита йиш яц уж. Лоархӏаме даьй, ноаной, урамашка арадувлача берашта тӏахьожам лоаттабе, шоай лоӏаме ма дита уж! Урамашка никъ бизза машинаш лел, иштта доал доацаш дӏахийца лела хьайбаш нийслу цига, цунга хьежжа шоай бераш долха моттиг йовзаш хила деза шо. Къаьстта терко е еза оаш цӏагӏарча хӏамашта а. Корех доахкача москитни оалача сеткаша бера дозал хьалкхабац шоана, вӏалла дагадоацача хана из меттагӏдаьнна чудожа йиш я, цудухьа цу хӏамай уйла еш хила тахан. Форда тӏа е мехкара ӏамарч, хиш долча шоаш салаӏа долхе, боккъал а берашта тӏера бӏарг ма баккха, шоашта юхера гаьна ма далийта. Массадолча хӏаман фийла хила деза вай тахан», - йоах Ӏалбаканаькъан Зарас ший къамаьла юкъе.
Бераш, кагирхой дагадоацача зуламех, хатарех лорадар боккхийбарий лоархӏаме декхар да. Моллагӏа харцдала тарлуш долча хӏаман юстара леладе бераш! Салоӏаш дола ахкан денош чакхдаллалца лоаттабе безаш болх ба из. Иштта мехкарча Минздраво беча хоамах, ахкан кхаь бетта цар керттерча оагӏон тӏа интернете белгалдеш хургда бераш хатарех, инфекцех, лазарех, иштта кхыдолча кхерамечарех лорадеш малагӏа болх лоаттабе беза. Лозадаьча бера лораш хьатӏакхачале, хьалхара гӏо дар мишта хила деза а дувцаргда цига. «Унахцӏенон гӏулакхех йолча министерствос могаш, маьрша болаш, иразе, беркате баха даькъалабувц мехкара дезалаш, дега гӏозленца чакхдоалалда шоана ахкан хоза денош!», - йоах тхога тахан кхаьчача хоама тӏа.
