Дешареи Iилмани Министерствон кулгалхочун вIашагIкхетар хилар РФ ГД депутатаца
Дешареи Iилмани гIулакхех йолча Министерствон кулгалхочун декхараш кхоачашдеш волча Цхьорой Ахьмад-Башира вIашагIкхетар дIадихьар Паччахьалкхен Думан депутатаца Татренаькъан Муслимаца. Из хоам «Сердалога» бир цу моттигера.
Министерствон балхах, юкъейоалае езача кердача дешара программех дийцар Ахьмад-Башира. Иштта цо баркал аьлар федеральни оагIонгара хулача новкъосталах. Белгалдир, цхьана болх дIахьош хилча, дешара гIулакх тоаде аттагIа долга.
«Татренаькъан Муслима дийцар, дешара оагIон моттиг ма хулла тоаеш къахьега дезилга, керда ишколаш хьалъе, тишъеннараш кердача куца тIа йоалае новкъостал де дезилга. Иштта хьакимаша теркалдир, дегIа могашал эшаенна долча берий дешар боаггIача боараме дIагIоргдолаш болх лоаттабе безилга», - аьлар министерствон болхлоша.
