Росархива кулгалхочо белгалдир вай Мехкадас архива балха юкъедена дакъа
Федеральни архивни агентствонна керте латтача Артизов Андрея баркал аьлар Гӏалгӏайчен кулгалхочунна Келаматанаькъан Махьмуд-Ӏаьланна, цо республикан архивни гулакх дегӏадоаладеча шийгара доккха дакъа юкъедихьа хиларах. Цох дийцар республикан Госархива кулгалхочо, исторически ӏилмай кандидата Ховтанаькъан Руслана. Мехка Кулгалхочо тӏадилла декхар кхоачашдеш, из хилар Омске дӏахьош хиннача Росархива Совета кхетаче дакъа лоацаш.
«Сердало» газетага Гӏалгӏайчен Паччахьалкхено ма аллара, лоархӏаме дар цига Ховтанаькъан Руслана, Артизов Андрея хинна къамаьл.
Росархива кулгалхочо баркал кхайкадир республикан кулгалхочунна, шин федеральни куран - Къулбехьен, Даькъастен ӏилма-методически архива совет цхьана вӏашагӏтеха, цо дика дӏаяхьарах. Из хилар Гӏалгӏайчен доазон тӏа, цига гулбелар дукха викалаш, доакъашхой.
Кхетаче дӏахьош архива болхлоша дийцар керттера хаттараш, цу юкъе таьрахьий хьал а долаш, исторически тӏехьале лораярах, архива урхаллен болх тоабарах.
