Базорканаькъан Микаила пьесах спектакль кийчъеш ба эрсий театра актёраш
Укх бетта 8-ча дийнахьа мехкарча Эрсий паччахьалкхен ашарий-драматически театра актёраша керда спектакль гойтаргья бахархошта - «Боккхийчар фаьлг. Кхел ювца гӏанаш е бесаш дола сурташ». Театра исбахьален кулгалхо волча Базорканаькъан Микаила язъяьча пьесах вӏашагӏъелла я спектакль. Вайна ма харра, цу сага кхоллам массахана ший тайпара белгала ба.
«Цкъарчоа-м фаьлг ба из, бакъда берий фаьлг бац. Дикка кӏоарга хьажа ловш барашта лаьрхӏа истори да из. Бокъонца дола хӏамаш, иштта хеталуш дараш вӏашкаоттадеш язбаь болх ба из. Вӏаший духьаллатташ, цхьана товш дола хӏамаш да цига белгалдераш. Х1аьта юкъера доазув мичахьа кхоачалу ха хало хул цхьайолча хана – гӏа маца кхоачалу, бокъонцадар мичахьа гучадоал, бесашца сурташ да уж е долаш дола хӏамаш да дунен тӏа… Базорканаькъан Микаила ший массайолча пьесашка санна вахара оагӏонцара хӏамаш теркалду укхаза. Тахан вайх хӏаранена ӏаткъаш дола хӏамаш да цо укхаза теркалдераш: даьй беркате ӏадаташ дӏадоалаш хилар, гӏалгӏай дезале тхьоврарча хана денз лоархӏаме, деза хиннараш дицдар, «харц хӏама» юкъегӏортар. Драматурга шийна хьалхашка оттадеш хаттар да, ӏадаташ юкъера дӏадаьлча фу хул вайх, яхар. Из мукъаяьнна моттиг сево е хьан дӏалоацаш я? Геттара гаьнадалале, соцаде йиш йий-хьогӏ из деррига?» - дийцар «Сердалога» мехкарча Эрсий театре.
Из цхьа моллагӏъяр санна спектакль йоацаш, бокъонцадар дувцаш болх ба. Сцена тӏара из кӏоарга, боккха чулоацам ма барра хьажархошта бовзийта безаш ба актераш. Вайна массанена довза дезаш хӏамаш да аьнна хет уж тахан, хӏана аьлча дукханешта къувлаш, сатем боабаь дола гӏулакхаш да уж.
