ХьатӀабоагӀача бетта, ша тӀа арабовла йиш хургья когсоалозаш хехкарий
Когсоалозаш хехка гӀулакх дезаденнараш тӀаэцаш, шоай наӀараш хьаелларгья хьатӀабоагӀача бетта «Бешлоам», «Аьрзи» яхача шан элгацаша.
ДукхагӀча даькъе цига гуллураш хоккей езараш ба. «Сердалога» из хоам бир Мехкадаь зарбан болх лелабераша.
«Бешлоам» яхача моттигера шан еррига кӀийле хийцай, иштта куц эргадаьккхад цу чурча ерригача моттигий, хийцаб фо чукхетийта гӀирс. «Аьрзи» яхача моттигера, деррига кхоачамбоацараш юстардоахаш, ша лоаттабеча оагӀонцара балхаш чакхдаьхад. Уж шаккха моттиг республикерча хоккейни оагӀон чуйоагӀаш я.
«ДӀахойодача хана а, спорта оагӀонца дувзаденнараш кердадоахаш, бахархой шоай дега езаеннача спортаца бувзам лелабе аьттув хургболаш, къахьегаргда оаха. УнахцӀена долча вахара тӀакхувш хила беза вай мехкахой», - белгалдир вай мехкадас Келаматанаькъан Махьмуд-Ӏаьлас.
Белгалде деза, шан элгацаш санна, хоккейни оагӀонна юкъейолхаш наьк деш йола моттигаш йолга.
