Гӏалгӏайчен вӏашагӏтеха тоаба котъяьлар, СКФО панкратионах йолча чемпионате
Гӏалгӏайчен гулъяь тоаба, дика толамаш гойтарах, котъяьлар Къилбаседа Кавказа федеральни куран панкратионах Чемпионат дӏахьош. Из хоам «Сердало» газетага бир моттигерча спорта министерствон зарбан болх лелабеча Гӏаппархой Аишас.
«Шин дийнахьа дӏайихьар «Магас» спорта Цӏагӏа СКФО Чемпионат, иштта Хьалхале къайсар, чӏоагӏагӏа болча панкратиона доакъашхошта юкъе. Цар шоашта карагӏдоалар гойтар классически, массазарча а тайпаех. Котало яккхара яхьеваьлар 887 спортсмен. Яхьий чаккхено хьагойтар, Гӏалгӏайчен тоаба шин даькъ тӏа котъялар. Вай спортсменаша 26 дошо, 23 дото, 32 борза майдилгаш яьхар.
Шоллагӏа моттиг яьккхар Нохчий республико. Кхоалагӏа моттиг Дагестана вӏашагӏтехача тоабо»,- йоах хоамо.
Вай республике иштта йоккхий яхьаш хьалхара дӏахьош хиларга хьежжа доацаш, уж дика вӏашагӏъехкаяр. Белгалде лов совгӏаташа гӏадвига хилар. Аз даькъалабувц вай спортсменаш, тренераш! Цуннца цхьана белгалду, мехка спортивни латара Федераце вице-президента дика болх дӏабахьар, из ва ГӏР панкратион дегӏаяра болх лелабеш вола Гаьгенаькъан Башир - болх вӏашагӏбеллар а спортивни тоаба кийчъяьр а», - аьлар Гӏалгӏай Республикан физически культуран, спорта министра Белхарой Руслана.
