Кулгаш гӀортадарах Россе чемпионате, 9 майдилг яьккхар вай гулъяьча тоабо
Дика толамаш гойтар ГӀалгӀайчера бахача спортсменаша, кулгаш гӀортадарах Россе чемпионат дӀайихьача Орёл яхача шахьаре, цига ийс майдилг яьккхар цар. Из хоам «Сердало» газетага бир ГӀалгӀай Республикан спорта Министерствон зарбан болх лелабераша.
Орел яхача шахьаре 400 спортсмен вар РФ 49 моттигера. ГӀалгӀайчера цига дакъа лоацаш хилар ялх спортсмен. Уж берригаш а кулгаш гӀортадара Федераце президента Котанаькъан Хьусена Ӏомабеш бар.
Тиймарзанаькъан ИбрахӀим, дозал 90 кг долаш ва, цо даьхар шиъ дошо, цаӀ борза совгӀаташ. Баркинхой Адам 110 кг дозал долаш ва, цо даьхар шиъ дошо, цаӀ дото совгӀаташ. Шиъ борза майдилг яьккхар ГӀалгӀайчен тоабанна чувоагӀача Янданаькъан Саварбика, из 100 кг дозал долаш вар. Цхьа борза майдилг Чомаканаькъан Хьамида яьккхар, ший дозал 110 кг долаш.
Юкъара хьаийцача, вай спортсменаша яьхар 4 дошо, 4 борза, цаӀ дото майдилгаш», - аьлар ГӀалгӀайчен спорта Министерстве.
