Лохерча Новгороде лаьрххӀача фецарча кемаца Ӏобигар унахой
2025-ча шерарча ахкан хьалхарча бетта 28-ча дийнахьа, Инаркъе газ ийккха лозаяь 1993-ча шерара нанеи бархӀ бутт баьнна бери тахан Ӏуйран лаьрххӀача фецарча кемаца Лохерча Новгороде дарба де Ӏодигар. Из хоам «Сердалога» бир унахцӀенон гӀлакхех йолча министерствос. 50% -га кхоачаш доагам да царна шиннена а, карарча хана цар хьал хала да.
«Лозабаьраш, МагӀалбикерча керттерча дарбанче Ӏочубоалабаь, реанимаце баьдаб. Хьалхара гӀо даьчул тӀехьагӀа, республикерча берий клинически дарбанче дадигар бер, арахьа дӀадугаргдолаш кийчо е. Республикера, федеральни оагӀонцара говзанчаш оарцагӀбаьнна, Приволжски тохкама унахцӀенон университета доагама дарба деча моттиге Ӏобига лаьрхӀар унахой.
Вай республикерча минздрава бувзам лоаттабу Лохерча Новгородерча лорашца, шаккха унахо халача хьале ва», - дийцар тха газетага.
