ГӀалгӀайчен ИЗО музей ший ди белгалдеш я
ГӀалгӀайчен паччахьалкхен исбахьален искусствай музее ший тайпара безаме я. ГӀалгӀай къаман культуран тӀехьале лораечун 32 шу даьннад. Цу юкъа укхаза дукха денад суртанчий балхаш, кулгаговзала гӀирсаш. Музее хиннад начӀал долча нахаца вӀашагӀкхетараш. Лоацца аьлча, музейс дика салоӀам бир искусство езарашта.
«Музей - из духхьал пенаши экспонаташи хинна Ӏац. Музей - уж нах ба, хьинар, культура я. 32 шу - из вай юкъара никъ ба, лаьрхӀачунга кхачарга сатувсаш цхьана дӀабихьа.
Баркал оал аз сайна уллув хиннарашта, тхоца цхьана музей хьакхолларашта-новкъосташта, тхоай хьамсарча, укх музее каст-каста боагӀаш болча наха, ГӀалгӀай Республикан кулгалхошта, культуран Министерствонна. Хьалха кхы а толамаш да вайга хьежаш», - аьлар гулбеннарашта хьалхашка къамаьл деш, ГӀалгӀай Республикан ГМИИ кулгалхочо ТӀумхой Любас.
