Гӏалгӏайчен СВО бӏухой дезалаша РЖД-тур дӏайолайир «Коталон шахьарашка»
«Шийвар ӏокхоссац» яхача проекта чудоагӏаш, «Даьхен лорабой» ганза, иштта «РЖД» ОАО хьаллоацаш, «Коталон шахьарашка» яха туристический никъ вӏаштӏехьбаккха таро хилар лаьрххӏача тӏема операце ветераний дезалашта.
Цу дикача наькъа бала таро йолаш ба тӏема сийлен моттигашка хьажа шин фусамера дезал, уж ва 11 саг. Цӏермашина никъ чакхбоал сийлен моттигашка, музейшка, мемориала комплексашка гӏолла. Шоай даьшца, зӏамигбараш хургба цӏихезача шахьарашка, уж - дошоча алапашца исторен мурагӏашка язъяь йола шахьараш, кхыйола моттигаш я: Дона-тӏара-Ростов, Волгоград, Новороссийск. Туристически тоабо дика хьалаш вӏаштӏехьадаьхад, укх заман цӏермашинаца бахар, цунна чуйоагӏаш культуран программа я.
Волгограде дезалаш баргба Мамаев дукъ тӏа, цигара царна гуш хургда «Даьхе-нана кхайк!» яха сийленг. Дӏахо цар экскурси хургья историко - мемориала «Сталинграде лаьттача тӏема Турпалхошта» яхача комплексе. Новороссийске царна довзаргда «Малая Земля» яха сийленг, иштта цӏихеза «Михаил Кутузов» яха кема. Дона-тӏарча-Ростове наькъахошта довзаргда гӏазкхий ӏадаташ, иштта Сийлахь-боккхача Даьймехка тӏом латтача шерашкара цар турпала истори.
Гӏалгӏай Республике гӏолла йолча «Даьхен лорабой» ганза гӏалгӏай филиала кулгалхочо Оздой Муслима яхачох, вай бӏухой берашта гургья шоай даь-даьша Сийлахь-йоккха Котало яьккха моттигаш, царна хоалургда, шоай даьй турпалал – из Россе сийдолча исторе тӏехьале хилар.
«Боккхача безамца, берашца наькъадоалаш да тхо, тхоашта цхьацца тамашийна хӏама нийсдаларга сатувсаш. Баркал ала лов сона укх тайпара салоӏам тхоашта баьча «Даьхен лорабой» ганза», - аьлар СВО ветерана фусам-нанас ӏарчакханаькъан Розас.
