Гӏалгӏайчера дезал финале кхаьчаб Ерригроссийски яхье
Олганаькъан-Хьулахой дезала Гӏалгӏайче гойтаргья Ерригроссийски, «Росси - тароний мохк» яхача яхье. Тӏеххьара дакъа дӏахьоргда, кӏимарса бетта 5-ча денгара 8-ча денга кхаччалца, «Сенеж» пхьоаллен моттиге, яхаш, дийцар «Сердало» газетага моттигерча къахьегама, вахара дегӏаахара Министерстве.
«Доакъашхошта хьалхашка оттаргда тоабашца цхьана кхоачашде деза декхараш. Котбаьннарашта вахара хьалаш тоадара дола сертификаташ лургда, хӏаьта беррига котбаьннараш дезалашца цхьана наькъа гӏоргба. Берригаш а шоллагӏча даькъе Гӏалгӏайченгара яхье дакъа лаьцараш берригаш а 177 дезал хилар. Яхь кхоачашъеш я «Дезал» яхача къаман проекта чуйоагӏаш, цун маӏан да ӏадаташ лорадар, къаман мах бараш вай ноахалашка кхачийтар», - аьлар тхоца къамаьл даьчо.
Олганаькъан-Хьулахой финале хиларо хьагойт Кавказе ӏадатий мах бараш лорадеш хилар. Гӏалгӏай дезал исторически цӏихеза ба боккхагӏбараш лоархӏаш, шоайла новкъостал деш, къаман овлаш лорадеш хиларца.
Цу тайпарча проекте дакъа лацаро таро лу берригача мехка гӏолла цхьан боккхача дезалга гӏолла Гӏалгӏайчен эздел дӏагойта. Вай мехкахой аьттув хилба котало яккха!
