Тӏема аренашка бӏухой байнача Галашкарча дезалашта гӏо деш хилар мехка
Тӏема аренашка къонгаш байна биса Галашкара дезалаш болча баха хилар «Даьхен лорабой» яхача ганза мехкарча филиала болхлой. Психолог йола Местой Хьава, Ӏарапханаькъан Мухьмад Келаматанаькъан Хьажмурд баха хилар, Ӏарапханаькъан Мусай Вахий дезал болча. Цар оагӏув хьаллаца, барайтта шерга кхачанза долча цар берашта гӏо де арабаьннабар уж.
Берашца къамаьл деш, арт-терапи дӏахьош ха яьккхар психолога. Тахан да дӏаваьнна гӏайгӏане дийрзача берашта къаьстта чӏоагӏа эш оагӏув хьаллацар. Цар хьал аттачахьа доаккхаш де дезараш белгалдир психолога берий нанна. Ӏарапханаькъан Мухьмада царца къамаьл деш техкар вахаре тахан малагӏа кхоачамбоацараш да, эггара чӏоагӏагӏа малагӏа терко эш. Цул совгӏа, санаторе баха дегӏа могашал меттаоттаяр дика хургдолга хьалхадаьккхар цо, иштта кӏезигагӏа саготдергдолаш бераш цхьацца кружокашка ахийтара тӏахьийхар. «Сердалога» из хоам бера «Даьхен лорабой» яхача ганза мехкарча филиалера.
Тӏема аренашкара къонгаш цӏа ца боагӏаш бисарашка хьежар, массахана царца бувзаме болаш новкъостал лоаттадар керттерча декхарех да тахан мехка. Иштта халача хьале эттарашта кӏеззига аттагӏа хул; уллув оагӏув хьаллоацараш, гӏайгӏа екъараш болга гуш хилча.
