Чамалха яхача юртара вахара хьал тохкаш хилар, сенатор вола Илезанаькъан Микаил
Чамалха яхача юрта ваха, цигара хьал тохкаш хилар вай мехкагара сенатор вола Илезанаькъан Микаил. Мехкадас Келаматанаькъан Махьмуд-ӏаьлас тӏадехка декхараш кхоачашдеш, дӏахьош болх бар из. Цу юртарча культуран цӏен, ишкола хьал техкар хьакима, иштта моттигерча администраце болхлошца юрта хьалхашка латтача кхоачамбоацарех дийцар.
«Сердало» газетага Илезанаькъан Микаила дийцачох, Чамалхарча цаӏ мара йоацача ишколе дешаш 1-ча классагара 9-ча классага кхоачалца 19 бер да. Дешархой кӏезига ба аьнна доацаш, ишколан хьал лертӏа, боаггӏача боараме болх дӏахьош хила деза. Ишкола гонахьара карт геттара тишъенна, вӏашкаяха йолга теркалдир сенатора. Йоккха юкъ ялале лертӏа карт оттаергйолаш соцам бир цига. Иштта теркалдир, ишколан коа лампаш цахилар, из бахьан долаш, ара баьдъелча кхерамзлен хьалаца дувзаденнараш телха хургда. Ишколан коа спорта лаьрхӏа зал хьалъе езилга белгалдир сенатора, берий паргӏатта физкультурах аха йиш хургйолаш.
Юртарча культуран цӏагӏарча кхоачамбоацарех дийцар администраце кулгалхочо. Цу оагӏонца а боаггӏаш бола болх дӏахьоргба эшараш меттадоаладеш»,- йоах тха газетага кхаьчача хоамо.
