Сенатор вола Илезанаькъан Микаил Гӏажарий-Юртара хьал тохкаш хилар
Гӏажарий-Юртара хьал тохкаш хилар сенатор вола Илезанаькъан Микаил. Цига хьалъеш латтача лоархӏамеча гӏишлой болх малагӏча боараме дӏахьош ба хьежар хьаким. Къаьстта терко йир дукхача хана денз юртарча бахархошта къувлачарна, эггара хьалхарча оагӏонца меттадоаладе дезача кхоачамбоацарашта.
«Эса, Дитткомара беша юхе спорта моттиг хьалъеча проектаца дувзаденнарех дийцар сенатора кхален администраце болхлошца. Укх шера гуйран бетта беррига болх чакхбаьккха кийча хила езаш я кагирхошта, берашта спортаца бувзам лелабе аьттув луш йола из моттиг. Цу моттиге гӏашлой никъ буллаш, лампаш йохкаш, басарашца наькъа юкъе къоастам беш, дӏабахьа безача балхах дийцар цига, белгалдир иштта кхыдола декхараш а. Цу юкъе да ишкол хьалъяр, хин лини тоаяр, дешара моттигашка, боккха болх дӏахьош, кулг тохар. Иштта теркалдир, Алхасте-Гӏажарий-Юрт яхача наькъа оагӏонца лампаш йогӏа езилга», - йоах «Сердалога» бенача хоамо.
Юртара хьал тохкаш ше дӏабихьача балхах дувцаш, сенатора белгалдир, бахархой хьал аттачахьа доаккхаш дола хувцамаш эггара керте латтилга. Кхоачамбоацараш латтача хӏара оагӏонга гӏолла болх дӏабахьа беза, гаьна ца доалийташ. Сенатора теркалдечох, юрта хинна хувцамаш бахархошта хӏара дийнахьа гуш хила деза шоай вахаре.
