Магасе бахархой тӏаийбеш Ди хилар, сенатор волча Илезанаькъан Микаила
РФ сенатор Илезанаькъан Микаил Магасе бахархошца кхетаче дӏахьош хилар. Бахархой хаттараш доашхача балха юкъе дакъа лоацаш бар мехкара кхыбола хьакимаш а.
«Хьатӏаихача наха къувлаш хиннараш дукхагӏча даькъе лаьттан доазошца, вахара оагӏонцара гӏо лоаттадарца, бахача моттигаца дувзаденна дар. Хӏара моттиг тохкаш къахьегаргда хьакимаша, цхьаккха хаттар дутаргдац терко ца еш. Цхьаццадолча гӏулакхашца дувзаденнараш тахка арабаьнна болх дӏахьоргба ше-ший оагӏонцарча хьакимаша. Латтача бокъонга хьежжа гӏо де хьожаргда хьаранена», - дийцар сенатора «Сердалога».
Дукхагӏа дола хаттараш унахцӏенон оагӏонца дувзаденна дар. Илезанаькъан Микаила къаьстта лакха терко йир берий унахцӏенонца, дарба де дӏабаха каьхаташ кийчдарца дувзаденнарашта. Иштта терко йир тӏема операце доакъашхочун къамаьла а. Даьхе лораеш латтарий цӏи тилла, аьнна, дийхар бӏухочо ше вахача урамах.
Муниципалитета хьакимашца бувзаме баьнна, тохкаргда из гӏулакх. Сенатора белгалдир, бахархошца каст-каста кхетаче дӏахьош хиларо цар вахарера кхоачамбоацараш ма дарра гучадоахилга, дӏабахьа безача балха йист яккха аттагӏа долга.
