Мехкарча унахцӏенон министерствон кулгалхочунца кхетаче дӏайихьар Илезанаькъан Микаила
Мехкарча унахцӏенон гӏулакхех йолча министерствон кулгалхочунца ӏалбаканаькъан Зарайца хиннача кхетаче цу оагӏонцарча лоархӏамедарех дийцар Илезанаькъан Микаила. Вай мехка 450 сага ӏобийша дарба де аьттув луш йола керда, таханарча ханага хьежжа хургйола дарбанче хьаеллара гӏулакхаца дувзаденнараш белгалдир хьакимаша.
«Унахцӏенон оагӏонца дувзаденнараш лакхача боарме кхоачашдаь хила деза тахан, хӏана аьлча цу оагӏонцарча балхага хьежжа хургда мехкарча бахархой хьал. Моллагӏа дола кхоачамбоацараш ханнахьа, ше-ший аргӏагӏа меттадоаладеш хила деза тахан. Бахархошца хиннача кхетаченашка массехказа хьоахадаьд унахцӏенон оагӏонцара хьал лертӏа хилийтарах, наха эшаш йола молхаш ӏалашъярах, иштта таханарча ханага хьежжа йола дарбанчеш хьалъярах.
Хьаеллаш йолча кердача дарбанче могаш боацарий хьал аттачахьа доаккхаш хӏамаш хургда – чакхбала, дегӏаца фу лазар да тахка, боаггӏача боараме дарба дӏадоладе аьттув хургба цига. Могаш боацарашта, цига болх беча лорашта йоккха паргӏато луш моттиг хургья цох», - дийцар «Сердалога» Илезанаькъан Микаила. Цу оагӏонцара эггара лоархӏаме дола хаттараш доашхаш хилар сенатор. Илезанаькъан Микаьила, ӏалбаканаькъан Зарас белгалдаьрашта юкъе лоархӏаме моттиг дӏалоацаш хилар бахархошта молхаш хилийтар, цу оагӏонцара кхоачамбоацараш ма хулла лаьгӏдар. Иштта къаьстта терко еш дийцар кхетаче, дегӏа могашал эшаеннача берашка хьажарах, цар хьашташ кхоачашдара тӏехьа къахьегарах.
