Гӏажарий-Юртарча кагирхой вахар ФОКо мишта хувцаргда дийцар, сенатор волча Илезанаькъан Микаила.
Чухьнахьа наьк де моттиг хургйола ФОК хьалъе лаьрхӏача Гӏажарий-Юрта ваха, цигарча бахархошца къамаьл деш ха яьккхар, сенатор волча Илезанаькъан Микаила. Цу моттиго дикача оагӏорахьа хувцаргда юртарча къонабарий вахар.
«Гӏишлон лаьрхӏа къоастадаьча доазонга хьежар сенатор. Спорта йоккхача гӏишлонга товш, цӏенача фега арабаьнна физкультура е, спортацара кхетаченаш дӏакхахьа аьттув болаш моттиг я, ала деза цох. 2027-ча шера дӏаболабергба из лоархӏаме болх. Хӏара денна спортаца бувзам лелабе, дегӏа хьал тоаде лерхӏарашта боккха аьттув ба ала деза цох. Керда ФОК юрта геттара эшаш я», - дийцар «Сердалога» Илезанаькъан Микаила.
Юртара къонабараш дер дайна, зехьа ха йоаеш леларгбоацаш, эшаш я ФОК. Зӏамига болча хана денз, наьк де ӏомабергба уж лакха говзал йолча тренераша, хӏаьта из чӏоагӏа лоархӏаме да дегӏа доал дара, букъ - тӏехк нийса хилийтара тӏехьа.
Иштта тайп-тайпарча секцешка дакъа лаца аьттув хургба къонабарий. Спортаца бувзам лоаттабе ловрашта доккха совгӏат хиннад цу гӏулакхах.
