Сенатор Илезанаькъан Микаил: Терроризм эггара доккхагӏа дола во
Хӏара шерарча Тов бетта 3-ча дийнахьа, терроризма духьала къовсам лоаттабара Ди дездеш хул мехка. Бӏехача, доккхача зулама духьале лоаттаярца нах цхьанкхеташ хила безилга белгалдеш, ди да из. Доккхача хатара юкъе нийсбеннача миллионаш наьха дегаш цхьана хотташ, цу зулама духьала къовсам лоаттабар хӏаранега кхоачаш декхар долга кхетадайташ, хала ди из хилар теркалдеш, къамаьл дир сенатор волча Илезанаькъан Микаила.
«Цу доккхача зулама юкъе нийсбеннараш дагабохаш; деналца, майралца харцача хӏаман духьаллатташ хьабоагӏача ӏаьдала болхлошта, баркал кхайкадеш да вай тахан. Терроризм яхар эггара бӏехагӏа дола во да! Цхьана хиларца мара духьале лоатталургяц цунна. Массахана фийла долаш, тешаме ца хетача хӏаман бух бохабеш, кхувш латтача тӏехьенна цу оагӏонца лораде дезараш массахана хьалхадоахаш хила деза вай», - белгалдир сенатора.
Илезанаькъан Микаила мехкахой тӏахьийхар вӏаший барт, воча гӏулакхашта духьале еча наькъ тӏа цхьоагӏо йолаш; мехка, республикан хӏама лорадеш; дика, беркате гӏулакхаш хьаллоацаш хилара.
