СВО доакъашхошта машин елар вай мехкарча сенатора
Тӏема операце доакъашхошта эшаш бола кхоачам лоаттабар, цар терко яр лоархӏамеча декхарех да тахан. Российски сенатора Илезанаькъан Микаила тӏадилла, вай мехкарча бӏухой рота лаьрхӏа машин йигар Украине.
«Сердалога» из хоам бера ДНР, ЛНР, Запорожски, Херсонски областашка массазара викал волча Фаьрганаькъан Тӏахӏирагара. «Кердача машинаца шоай тӏема декхараш кхоачашдеш лела дуккха аттагӏа хургда бӏухошта. Разведчикаш болаш лелача салташта чӏоагӏа лоархӏаме да из совгӏат», - дийцар тха газетага.
Тӏемахоша доккха баркал аьлар сенатора, цун гӏонча волча Загӏенаькъан Ахьмада, шоашта терко лоаттаярах. Салташа белгалдечох, къаьстта цар дӏахьоча балхаца из машин геттара эшаш яр. Вӏаший тӏаотташ, массахана цхьана хиларо дикагӏа аьттув лу, тӏема аренашка лелача вай бӏухошта.
