ГӏалгӀайчен Ӏаьдала болхлоша чӏоагӏа ӏаткъаш йола молхаш гучаяьхар
Гӏалгӏай мехка, Ӏаьдала болхлоша чӏоагӏа саг доалара воаккхаш йола дукха молхаш хьаяьхар. Наркотӏахьожама, угрозыска, Шолжерча полице болхлой, иштта республикански ОФСИНа викалаш цхьана болаш, из болх дӏахьош, 37 шу даьнна Шолжера вахархо соцавир. Хьалхагӏа лаьца ваьлла из маӏа саг хӏанз къайлагӏа наркотикаш йохкаш хиларах дегабуам беш вар.
«Киа Рио автомобилаца воагӏаш, из Шолже-Магӏалбик наькъ тӏа бокъонаш лораераша юхасоцавир, доазон тӏарча чурча гӏулакхий Госавтоинспекце ДПСа новкъостал а деш. Чухьежачул тӏехьагӏа, цун наьна цӏерах йолча иномарка чура, бокъонаш лораерий болхлоша, шоай служебни жӏалий а долча кинологаша новкъостал а деш, машина тӏехьашкарча наӏара тӏатехача кӏада кӏалхара къайлагӏа дӏаехка йоахка 376 даькъах латта цӏе-кӏай бесара капсулаш корайир, иштта 180 коачал чуйола шушингаш а. Республикански МВД экспертно-криминалистически центра говзанчаша чӏоагӏдир, уж цунгара хьаяьха молхаш вай мехка лелае бокъо йоаца прегабалин, тропикамид хилар. Юкъара ерригаш а дӏалаьрхӏача, уж яр 3,8 кг. Цу сага дарий дир, ше уж молхаш Гӏалгӏайче маьхалъяха Ставропольски краера ийца хилара», - аьлар «Сердало» газетага Гӏалгӏайче гӏолла йолча Россе МВД зарбан болх лелабераша.
Россе МВД «Сунженский» МО дӏабихьача балха чаккхе еш, цу сага духьала зулам дарах уголовни гӏулакх хьадийллар д.3 ст. 234 УК РФ. Из иштта административни бехктокхаме оттаваьв, цо наькъа бокъонаш телхаярах. Тохкама болх дӏахьош гучадаьлар, хьалха транспорт лелаяра йола бокъонаш цунгара дӏаяьха хилар.
Из саг хӏанз ИВС чувоалл, Россе УПК 91 статьях доагӏаш ма хилара. Цо даьча зуламах доагӏаш дола таӏазар къоастадеш болх дӏахьош ба.
