Граждански дош дувцача балха юкъе, каьхаташта харцахьа тоадараш даьча 5 сага духьала гӏулакх хьадийллар мехкарча СК
Граждански суде каьхаташца тийшаболх кхостабарах бехктокхаме озаргва мехкара пхи саг. РФ УК 1-ча даькъа 303 ст. бехке беш ба тахан уж нах Россе вай мехкарча Тохкама Комитета къаьстта лоархӏаме долча гӏулакхех болх дӏахьош болча тохкамхоша (харцахьа оттадаьча каьхаташца тийшаболх кхостабар). Цхьаккха бух боаца каьхаташ дар цар судага гойтараш, шоай гӏулакх ма хетта чакхдалийтар духьа.
«2023-ча шера кӏимарса бетта цу тоабо вӏашагӏбеллар боккха тийшаболх ба. Наьха хӏама шоай доалахьа дерзаде безам болаш, шоаш леладер нийса хетийта, из саг шоашта 200 миллион декхар хьадала дезаш тӏалатташ вар, аьнна, бакъдоаца каьхаташ вӏаштӏехьдаьхад цар. Граждански гӏулакха дӏаюкъедахийта, цу хӏаман чаккхе шоашта аьттув хургболча тайпара хургйолаш, тийшаболх кхостабаьб цар. Хьалхагӏа РФ УК 3-ча даькъа ё163 ст. «б» п. бехктокхаме эза хиннаб уж нах (боккхача боарамера наьха хӏама шоай доалахьа дерзаде гӏортар, наха низ беш); РФ УК 1-ча даькъа 222. ст. (бокъо йоацаш герз, иштта цунцара хӏамаш леладар); РФ УК 1-ча даькъа 222.1 ст. (лелхаш дола герз бокъо йоацаш цӏагӏа леладар, эцар); РФ УК 3-ча даькъа 30-ча ст., 4-ча даькъа 159 ст. (геттара боккхача боарамах латта наьха хӏама тийшача белхаца хьадаккха хьажар); РФ УК 3-ча даькъа 30-ча ст., 1-ча даькъа 105 ст. (саг ве гӏортар), 1-ча даькъа 139 ст. (наха духьале ешшехь, низагӏа цар цӏагӏа чубалар), 1-ча даькъа 209 ст. (наха духьала тийшаболх, дов леладе герз дола бӏарчча тоаба вӏашагӏйоллар), 2-ча даькъа 209 ст. (герзаца кийчбенна болаш, наха чухьалхар, низ тӏалоаттабар, зулам дар)», - дийцар «Сердалога» Тохкама комитета болхлоша.
Из деррига хӏама тохкаш, боккха болх дӏахьош ба тахан ӏаьдала болхлой. Россе ФСБ, мехкара моттигера ФСБ, МВД тохкама болхлошкара, СКФО МВД оагӏонгара кхаьчача каьхатех дӏаболабаь ба из болх.
