Кавказхой дувхарах дийцар Оалкамарча дешархошца
Къилбаседа Кавказе дахача къамий дувхарах дийцар, Оалкамарча берий беша- ишкола дешархошца, культуран Цӏен болхлоша. Республикерча культураца дувзаденнараш берашта дӏадовзийта, лерхӏам бергболча тайпара къаман ӏадаташ, истори духьалдахьа вӏашагӏъелла кхетаче яр из.
«Кхетаче дӏахьош хиннача Гӏарбакханаькъан Мадинас берашта дийцар къаман дувхар духхьал барзкъа хинна ца ӏелга. Тхьоврача хана денз, вай даьша- ноаноша лорабеш хьабена гӏирс ба из. Къаман дувхарцара хӏара хӏама ший кӏоарга маӏан долаш да. Къаман овла, беркате ӏадаташ белгалдеш бола оагӏув лоархӏаш хьаденад къаман дувхар, таханарча денга кхаччалца. Тӏехьенгара тӏехьенга кхоачаш дола, хана йӏоахалца хувцалуш доаца дувхар да из», - дийцар «Сердалога» кхетаче дӏахьош хиннараша.
Бераш чӏоагӏа дог айденна дар цу кхетаченах, къаман дувхар чӏоагӏа хозахеташ, цунга хьежаш дар уж. Царна хьалхадаьккхар из тхьоврача шерашкара вайга хьакхаьча даьша, ноаноша леладаь эздий дувхар долга. Росси боккха мохк ба, дукха къамаш дахаш. Хӏара къам ший ӏадаташ, культура, истори долаш да, хӏаьта вайна хьалхашкара лоархӏаме декхар да гӏалгӏай къаман истореца, селханарча деношца дувзаденна беркате ӏадаташ цадоадар, царца лерхӏам хилар.
