Эккажкъонгий-Юртарча дешархошта дийцар къаман мах барех
«Дешархошта культура» яхача боахамашта юкъера культуран-дешара проект кхоачашъяра, Наьсарен кхален культуран Цӏено дӏайихьар Эккажкъонгий-Юртарча №3 йолча юкъерча ишкола дешархошца «Къаман мах бараш» яха пайдане кхетаче.
«Гӏалгӏай къам, бӏаьшерашка денз, хьадоагӏа къаман ӏадаташ, цун белгало лораеш, из ноахалгара ноахалга кхоачийташ. Къаьстта цунца дувзаденна дар Наьсарен РДК режиссёра Эккажанаькъан Маринас берашта дийцар. Цо хьалхадаьккхар царна, керттера тӏехьале даьй ӏадаташ долга. Цох доаккхал деш хила веза хӏара гӏалгӏа. Къамаьл дӏадихьар шоайла дӏа-юха эцаш. Бераш духхьал ладувгӏаш хинна а ца ӏеш, шоашта хетар къоастадеш, хаттараш луш дар, цар дийцар къаьнара ӏадаташ таханарча вахарга дахара хьал», - аьлар «Сердало» газетага культуран-салоӏама урхаллен кулгалхочо Дзейтанаькъан Тамерлана.
Шоашта хьийхар чӏоагӏде таро хилар берий «Гӏалгӏай культура дика ховш вар» яха хьаькъале викторина дӏахьош. Из вӏашагӏъеллар РДК исбахьален кулгалхочо Кӏуренаькъан Ӏайнас.
Терко тӏаозаш дар цига шин тоабо цхьатарра толамаш дахар. Цар гойтар шоашта гӏалгӏай мотт дика ховш хилар. Котдаьлар доттагӏал, керттердар - бераш шоай овла безаш, из миштаб ха гӏерташ хилар.
