Сийлахь-боккхача Даьймехка тӀемах дувц дешархошта
Сийлахь-боккхача Даьймехка тӀема юкъе, немце вай лаьтташкара аравоаккхаш, яьккхача Коталон 80 шу дизара хетаяь кхетаченаш я, мехкарча моттигашка дӀакхухьаш.
«ГӀалгӀайчен бахархой - Сийлахь-боккхача Даьймехка тӀема турпалаш» яха цу оагӀонцара кхетаче дӀайихьар республикерча паччахьалкхен музее. Лекцех, экскурсех - шин даькъах латташ яр тӀема аренашка майрал гойташ, гитлерхой эшабеш лаьттача къаман къонгий цӀераш, цар тӀема никъ бовзийташ йола кхетаче. Дешархошка тӀемхой сурташ дӀахьокхаш лекци дӀайихьар яр РМИИ кхоллама оагӀонцара болхло Булах Анна. Лекци йистеяьлча, дӀабахача бетта 29-ча дийнахьа музее хьабийллача гойтамах экскурси йир берашца ГМИИ керттера Ӏилман болхло йолча Акхтоланаькъан Тамусе.
«Кхувш латтача тӀехьенца иштта бола болх дӀакхахьар чӀоагӀа лоархӀаме да тахан. Бирсача шерашка вай мехкара моастагӀий арабаха гӀерташ лаьттача къонгий цӀераш йицъялийтац цо, цар сий де, дагалоаттабе Ӏомабу кхувш боагӀараш», - дийцар тха газетага музее.
