Интернета оагӏонашка лоралуш хила безилгах, иштта кагирхой оагӏув хьаллацарах, дийцар Наьсарерча дешархошта
Наьсарерча № 5 йолча ишколе дӏайихьар « Вахара оагӏонаш: лоравала везараш, царех хьахулар» яха лекци. Интернета оагӏонашка фийла хила везараш, эггара чӏоагӏагӏа къонабараш лорабала безараш белгалдеш кхетаче яр из. Дешархошца къамаьл де венавар миннаца болхло Йовлой Абдуссалам, дийша саг, хоамашцарча кхерамзленах болча оагӏон, кагирхой гӏулакхех йолча Комитета болхлой.
«Сердалога» бенача хоамах, къонабарашта дийцар шоай хӏама интернетерча зуламхоех лорадар мишта хила деза, цхьацца говзалца къонабараш ӏехабе, кегабе гӏерташ болх лоаттаберашка ладувгӏа, царца бувзаме вала йиш йоацилга. Дешархошта хьалхадаьккхар, миччахьа санна интернете а, саг ший сий доадергдолча гӏулакхех лоралуш, эзделах ца вохаш, бӏехача, воча наха хьалхадоахар теркал ца деш хила везилга. Интернета оагӏонашка ше моллагӏа хӏама яздеш, ӏочуоттадеш хилча, цкъа хьалхагӏа дикка уйла е еза сага, моллагӏа бокъо йоаца, харцахьара хӏама тӏехьагӏа бехктокхаме озаш хургдолга белгалдир къонабарашта.
Кагирхой гӏулакхех йолча комитета болхлоша дийцар «Роскагирхой.Гранташ» яхача Ерригача Россе яхьашка дакъа лацарах; дика, беркате дола хӏама доаржаде гӏертача къонабарий паччахьалкхено оагӏув хьаллацарах, гӏо дарах.
Терроризм яхача доккхача, бӏехача зулама духьала къовсам лоаттабарах дола каьхаташ дӏадийкъар царна, иштта «Роскагирхой. Гранташ» яхача яхьашка дакъа лацар, дехар чудалар мишта хила деза хьалхадаьккхар.