Гӏалгӏайчен лицеисташа Россе халкъий культура гойтар
Гӏалгӏайчен Наьсарен кхален «Олимп» лицее «Россе низ - цхьоагӏонца» яха фестиваль дӏайихьар, из хетаяь яр халкъа цхьоагӏон Ди, иштта РФ Президента Путин Владимира хьакхайкадаь Россе халкъа цхьоагӏон Шу хилара. Кхетачен хьаьший бар Гӏалгӏайчен Паччахьалкхен Председатель Сластенин Владимир, республикан дешара, ӏилман министр Цхьорой Ахьмад-Башир, яхаш, дийцар «Сердало» газетага республикан Паччахьалкхен зарбан болх лелабераша.
Кхетачен даькъ тӏа дар тематически гойтамаш, цига го йиш яр мехка дахача халкъий дукхача тайпара культураш. Хьаьшашта довзийтар тӏадувхаду къаман гӏирсаш, кулгаговзалаш. Къаьсттача даькъ тӏа лицея дешархоша оттадир къаман даарий истол.
Концерта, яхьий программашта чудоагӏаш дар дешархой кхолламаш. Хӏара класса кийчъяьяр Россе дахача къамий культураш гойташ йола номераш - лакий, якутий, дона тӏарча гӏазкхий, марийций, татрий, алтайций, карейций, башкирий, бурятий, Россе бахача циганий, ненций. Кхело мах оттабир доакъашхошта карагӏдаьнначоа, диъ даькъа дийкъа: «Дикагӏа йола видео», «Дикагӏа дола халкъа халхар», «Дикагӏа дола халкъа илли», «Дикагӏа дола даарий истол».
Сластенин Владимир хьежар экспозицега, цун иштта къамаьл хилар дешархошца, лакха мах оттабир цар яьча кийчонна. Премьер-министра гулбеннарашка моаршал хаьттар Гӏалгӏайчен кулгалхочун Келаматанаькъан Махьмуд-ӏаьлий цӏерагӏа, цо белгалдир цу тайпара кхетаченаш дӏаяхьар лоархӏаме долга, цар халкъашта юкъера барт чӏоагӏбеш хилар.
«Оаш тахан деш дар, къамаш вӏашагӏтохаш да. Вай мехка 170 гаргга къамаш дах, Гӏалгӏай Республике - 76. Уж берригаш а машарца, бартаца бахаш ба. Иштта дӏадаха деза дӏахо а», - аьлар республикан министрий кабинета кулгалхочо.
Фестиваль чакхйоалаш совгӏаташ делар котбаьннарашта. Цул совгӏа, Сластенин Владимира Гӏалгӏайчен Паччахьалкхен Сийлен грамоташ елар хьехархошта: «Олимп» лицея кулгалхочун декхараш кхоачашдеш йолча Харсенаькъан Луизайна, кулгалхочун гӏончашта Жаглина Инессайна, Тӏумхой Амината, кулгалхочунна хьехамаш деча Ӏамарханаькъан Мединайна; эрсий метта, литературан хьехархочоа Новрбенаькъан Розайна; математика хьехархочоа Янданаькъан Райхьанта.