«Гӏалгӏай 1877-1878 шерашка эрсий-туркий тӏем тӏа» яха гойтам ба, республике болх беш
Гӏалгӏайчен къам мехкахдаккхара Мемориала моттига музее хьабийллар «Гӏалгӏай эрсий-туркий тӏем тӏа 1877-1878 шерашка» яха гойтам. Из хетабаь ба, гӏалгӏай оагӏув чубоагӏаш хиннача, цӏихезача Лоаман-Тирка дошлой бӏу вӏашагӏбеллача исторически ден 150 шу дузаш хилара, яхаш, дийцар «Сердало» газетага из болх вӏашагӏбеллараша.
Гойтаме дика го йиш я Гӏалгӏайчен бӏухой исторически оагӏонаш, цар Балканашка, иштта Даькъасте лаьттача тӏемашка дакъа лаьца хилар. Архива каьхаташка, исторически хоамага гӏолла го йиш я, наггахьа мара гуш йоаца материалаш, цига гуш да уж эрсий эскарца цхьана, денал гойташ, латаш хиннилга балкански къамаш кӏалхардоахаш, цар цу юкъе доккха дакъа дена хилар.
Цига дувц цӏихезача гӏалгӏай къаман викалех лаьца, цар цӏераш цӏаккха йовргйоацаш язъяьй Российски паччахьалкхен тӏема оагӏон тӏа. Къаьстта терко тӏайохийт Боазаркъанаькъан Бейсара Бӏунахочоа - из ва Российски импере эскара, гӏалгӏай къаман хьалхара инарал-майор. Цига хьажа боагӏача наьха таро я, цун дикача тӏема наькъах лаьца, цун денал, Даьхен хьалхашка из бехктокхаме хилар довза, гӏалгӏай эпсарий тоаба хьакхоллара цо малагӏа дакъа лаьцад ха.
Гойтамо тӏахьех дӏаяхача ханашка даьшта карагӏдаьннар диццадара, вай заман ноахалий царца бувзам хилар белгалдара, иштта дукхача бӏаьшерений ханашка денз, Россена гӏулакх дара кийча долаш вай хьадоагӏаш хилар диццадара.