Кердача Реданта дешархошта дийцар, композитора Шодажанаькъан Ф. кхолламах
Кердача Реданта культуран Цӏагӏа кхетаче дӏайихьар Гӏалгӏайчен композитора Шодажанаькъан Махьмада Фаризайна хетаяь. Кхетаче яр «Дешархошта лаьрхӏа культура» яхача проекта чуйоагӏаш. Цун декхар дар кхувш йоагӏача тӏехьенна профессиональни моттигерча ашарий говзал йовзийтар.
«Шодажанаькъан Фариза я Гӏалгӏайчен ашарий искусствон исторе сийрда оагӏув. Цун цӏи ювзаенна я къаман композиторски ишколаца.
Шодажанаькъан Фаризай кхоллам вай мехка дика цӏихеза а бовзаш а ба, атта дагахьа юсаш я цун композици. Къаьстта из наха атта тӏаэцаш а, безаш а хиларах, ший къаман безам тӏаозаш хул цун болх»», - аьлар «Сердало» газетага Кердача-Реданта культуран Цӏен кулгалхочо Хоаной Марета.
Шодажанаькъан Фаризас лораю къаман исбахьален оагӏув, ашарий маӏан, уж тахан Гӏалгӏайчен культуран тӏехьален керттера дакъа дӏалоацаш да. Цо къаьнарча ашарашта керда вахар лу, уж екаш я таханарча оазаца. Композитор йолча Махьмада Фаризайна ший даьй тӏехьале салоӏам а ба, искусство дегӏайоалаяра кӏийле а я.
