Гӏалгӏайчен дешархой Аьдагӏий ӏадаташ довзаш хилар
«Дешархошта - культура» яхача ерригроссийски проекта чудоагӏаш, Гӏалгӏайчен Паччахьалкхен галерее бахар Шолжерча №1 йолча ишкола 8-ча класса дешархой. Берашта укхаза дика экскурси дӏайихьар «Черсий йоӏ. Барт, хозал, товш хилар» яхача гойтамах. Из кийчбаьр яр Аьдагӏий къаман музей.
«Экскурси дӏахьош берашта дийцар, ӏадаташ довзийтара гойтам хетабаь хиларах, цу юкъебоагӏаш бар тайп-тайпарча исторически ханашка аьдагӏий кхалнаха лелабеш хинна тӏабувхабу гӏирс, куца лелаю кхыйола хӏамаш. Цо чулаьцар вай зама ялале хинна Хӏӏ- Vӏӏ бӏаьшераш, вай заман ХӏХ бӏаьшерен ханаш. Экспозици екъалу шин даькъа: археологически, цига гуш я къаьнара вахаре лелаеш хинна хӏамаш, хозала кхоачам, иштта этнографически оагӏорахьа го йиш я бера хана, къона болаш, хьоалчагӏашка, маьре болхаш лелабеш хинна гӏирс. Цо берашта гойт аьдагӏий кхалнаьха вахар мишта хувцалуш хиннад шераш дӏа мел ух», - аьлар «Сердало» газетага Паччахьалкхен галерее.
Цу тайпара кхетаченаш дӏахьош хиларо таро лу кхувш йоагӏача тӏехьенна истори, искусство дикагӏа йовзийта. Тхоца къамаьл даьчо яхачох, Гӏалгӏайчен Паччахьалкхен галерея хьож берашта лоалахарча къамий ӏадаташ довзийта. Лоалахой культура ӏомаеш, дешархой таро хул, Кавказа къамий ӏадаташ довза, юкъара истори кӏоаргагӏа кхетаде.
