Шолжа-Шахьарерча гойтамий галерее баха хилар дешархой
Шолжа-Шахьарерча № 8 йолча ишкола дешархой кхоллама оагӏонца дувзаденнараш довзаш хилар. Кавказа культура йовза дагахьа, Паччахьалкхен гойтама галерее гӏолла экскурси дӏайихьар цар. Гӏаьбартой-Балкхарой мехкарча суртанчий боккъал башха дола балхаш дайра царна цига. Бӏарга мел дайначо дог айдаь долга гуш дар бераш.
«Аькхенаькъан Хасолта балхаш довзийташ дӏайолаелар экскурси. Хӏара сурт ший тайпара маӏан долаш, къаман истореца, культураца бувзам хотташ диллалга теркалдир зӏамигача хьаьшаша. Цул тӏехьагӏа царна бовзийтар «Хана хин юхера наб» яха гойтам. Гӏаьбартой-Балкхарой мехкара лакха начӏал дола суртанчаш Саральп Мадина, Газаева Разият бар уж балхаш кхоллаш къахьийгараш», - дийцар «Сердалога» музея болхлоша.
Бераш ишттача моттигашка кхувлар, къаман, лоалахарча мехкий культура царна йовзийтар боккха лерхӏам болаш да тахан. Кавказе дахаш долча къамий истори, ӏадаташ, культура йӏаьхий йолга теркалдир цар, залашка гӏолла гобоахаш.
