Яндарерча дешархой кхетаче хилар суртанчаца Цхьорой Аюпаца
Яндарерча культуран Цӏагӏа «Маьлха баьречун никъ» яха кхоллама сайре дӏайихьар, суртанча вола Цхьорой Аюп вийха. «Дешархошта лаьрхӏа культура» яхача ерригача Россе культуран-дешара проектага гӏолла дӏахьош яр из кхетаче. Ший балхаш довзийтарал совгӏа, суртанча никъ малагӏча гӏулакхех латташ ба дийцар Аюпа берашта.
Кхоллама вахаре эггара хьалхара гӏа баккхар мишта хилар, суртанча волча сага эггара чӏоагӏагӏа терко е езараш малагӏаш да, дийцар цо. Воккхача, мехка цӏихезача суртанчан балхаца нийслуш дола цхьацца гӏулакхаш, лоархӏамедараш дайзар къонача тӏехьенна.
Берашта доккха совгӏат хиннадар, Цхьурой Аюп шоаш долча варах, хӏана аьлча къонабарий дукха хаттараш дар цунга дала. Кхолламца къахьегаш волча сага вахар духхьал толамех латташ доацилга, вахара наькъ тӏа дукха тайп-тайпара хӏамаш нийслулга кхетадир къонабараша. «Сердалога» из хоам бера культуран Цӏен исбахьален оагӏонцарча балха кулгал деча Йовлой Мадинайгара.
Белгалде деза, цу оагӏонцара кхетаченаш еш, къонабараш гулбар тахан къаьстта лоархӏаме долга. Вахаре беркате хургбола никъ хьалаьца; хьинаре, бехктокхаме цу наькъ тӏа къахьегаш дӏавахар, ший моттиг лаха хар хӏаранена доккха долга кхетадир бераша цу дийнахьа.
