Хоржамий балхацарча бокъонех дийцар дешархошта
Россе хоржамий оагӏонца дувзаденнарех, цу гӏулакхацарча бокъонех дийцар вай мехкарча ишколашка. Республикерча 12 ишколе «Хургвола хоржамхо: Россе вахархочун бокъонаш, декхараш» яха тематически лекци дӏахьош хилар «Кхетам» яхача Российски юкъарлон доакъашхой, иштта хьехархой. 600 совгӏа дешархо чулоацаш болх хилар цох. Лектораша къонабарашка дийцар шоай декхар дизза кхоачашдарах, хоржамий балхаца дувзаденнача лоархӏамедарех.
«Хьехархоша къамаьл деш хилча гӏулакх тешаме лоархӏ бераша. Бокъонех йола статьяш йовзийтар хинна ца ӏеш, хоржамашка дакъа лоацаш хилар ший юрта, шахьара, берригача мехка уйла еш, цар хьалах дог лазаш хилар долга хьалхадоаккх оаха къонача тӏехьен. Из тахан лоархӏаме да! Кхоана, кхийна баьнна хоржамашка дакъа лаца йиш йолча хьале эттача, таханарча берий цу оагӏонцара кхетам лакха хургболаш, из хӏама тӏаэцар, Даьхенах дог лазаш вола хоржамхо хинна дӏаоттар мишта хила деза царна ховргдолаш дахьош ба из болх тахан», - дийцар «Сердалога» даьй, ноаной хьалхаленах йолча яхьашка котало яьккхача Овшанаькъан Танзилас.
«Кхетам» яхача моттигерча Юкъарлон оагӏон кулгал деча Хьулахой Ахьмада белгалдир, иштта йолча кхетаченаша дикка пайда белга. Цо теркалдир, бокъонашцарча кхетамца дувзаденнараш ишколе багӏача хана чӏоагӏлуш долга, цу хана хьаийцар тӏехьа тӏа - йоагӏача хана лард хиле дусилга. Россе хоржамий балхаца дувзаденнараш ма дарра довзийташ бола болх, терко еш, дӏахобахьа лерхӏ мехкарча къонабарашца.
