Тохкама комитета хьалхадаьккхар, бераш корех аралегарах лорадар
ГӏР гӏолла йолча Россе СК тохкама урхаллено ший МАХ-канала тӏа хьалхадоаккх бераш корах аралегаш хилар юхатоха дезилга, яхаш, хоам бу «Сердало» газетага бокъонаш лораераша.
«Ара йӏовхал хьаэттача, хӏара шера дукхаза нийсденнад бераш корех аралегаш. Цу тайпара хьал нийсделча каст-каста човнаш хулаш, бераш леш а моттигаш хул.
Вахаро хьагойт, зӏамига бераш, даьй тӏахьожам боацаш дисача, шоаш деррига хара тӏакхувш ма хиллара, хийла кхыйола мебель а оттайийя, кора тӏа дала хьож, из хьаделла безам болаш, тӏаккха москитни цхарал бохабийя чулег», - аьлар хоамо.
Цу тайпара нийсденна хьал моллагӏча дезала а унзара да, гаргарча наха бала ба. Цудухьа боккхийбараш берий терко йолаш хила беза. Бераш цхьаь дита йиш яц, кхерамзлен ӏалашо йий хьожаш хила веза ше вахача моттиге.
Гӏалгӏайчен тохкама комитета цӏаькха а хьалхадоаккх берий даьшта, тӏахьожам боацаш, уж цхьаь дита йиш йоацилга. Иштта корага лаьрххӏа бола гӏирс оттабе беза. Корашта юхе латташ яле мебель дӏахо яккха еза, цул совгӏа берашта даим хьалхадаха деза цӏагӏа а ара а кхерамзле лораяра дола хьал, уж кӏеззига мукъагӏа сакхетам болаш хургдолаш. Лоацца аьлча, шийна могар де деза, берашта зулам даргдоацаш.
