СКТЭК студенташца наркоманена духьалара кхетаче дӏайихьар
Заьзгакъонгий-Юртарча культуран Цӏен болхлоша дакъа лоацаш, наркомани яхача доккхача зулама духьалара кхетаче дӏаяхьа гулбелар Даькъастен доагора-энергетически колледжа доазон тӏа. Кхетачен кулгал деш хиннача Чаненаькъан Тамарас белгалдир, цун керттера декхар къона тӏехье наркотик яхача дохьажах лораяр долга.
«Цу кхетаче дакъа лоацаш бар Магӏалбика кхален наркоманена духьала болх лоаттабеча кхелахой секретарь вола Хамхой Ӏалихан, Магӏалбика кхален райсовета депутат Ӏаьленаькъан Дауд, мехкарча Халкъа Гуллама депутат, СКТЭК кулгалхо Чуранаькъан Мустафа.
Студенташта нийсагӏдар хьалхадоаккхаш, зуламе долча хӏамах лорабалара тӏахьехаш, къамаьл дир цига массане», - йоах «Сердалога» бенача хоамо.
Чуранаькъан Мустафас ший къамаьла юкъе белгалдир, беррига студенташ хьехархошта, колледжа кулгалхошта шоай дезал санна гарга, царех дог лазаш болга. Цунга хьежжа, хӏаране вахара никъ сийрда, беркате хилар деза массанена. Наркотикашца бувзам лелабаро вахар толхадаьча нахах дийцар цо къонабарашта. Наркоманена духьале ярах йола Лаьнанаькъан Марема, Кулиев Кайсына байташ йийшар цига Заьзгакъонгий-Юртарча культуран Цӏен доакъашхо йолча Чуранаькъан Рахьимас.
Белгалде деза, цу оагӏонцара кхетаченаш каст-каста дӏакхахьар къонабарий вахаре дикка пайда беш долга. Наркомани яхача доккхача, бӏехача зулама никъ хоадабара, къонабараш цу хӏаман юстара хилийтара тӏехьа болх дӏахьош хила деза вай тахан.
