Гӏалгӏайчен Соцпедколледжа студенташца бокъонаш йовзийташ болх дӏабихьар
Вахара-хьехархой колледжа студенташа шоай бокъонаш йовзара дикал лакхйир, ПДН инспекторашца кхетаче йолаш. Гӏалгӏайчен кагирхой гӏулакхех йолча Комитето вӏашагӏъеллача кхетачене таро хилар кхувшбоагӏарий законаш, бокъонаш дикагӏа йовза. Говзанчашца цхьана цар къоастадир вахара хьалаш, царна хайра харцахьара гӏулакх мишта довза йиш я, бокъонаш толхаеш долча хьалах мишта лоравала веза.
«Цига белгалдоалаш дар бераш паргӏатта шоайла къамаьл деш, дагадоалаш хилар. Цар бокъо яр шоашта хетар дӏаала, хаттараш дала, долаш долча хӏаман мах хоадабе.
Деша багӏараша хьагойтар шоаш цу гӏулакха терко тӏайохийташ а, из дош дувцаш раьза болаш а хилар, царна цу тайпара кхетам луш дола вӏашагӏкхетар эшаш долга гуш дар», - аьлар «Сердало» газетага республикан кагирхой Комитете.
Боккха пайда эцаш дӏайихьача цу кхетачен болх вӏашагӏбеллараша кхувш боагӏарий гӏулакхех йолча моттига болхлошта баркал аьлар, цар лекци дӏахьош, кхелахой болаш дакъа лацарах. Цо хьагойт цу тайпара кхетаченаш эшаш хилар.
