Паччахьалкхен филармоне солисташ Карца бахар, дешархошта концерт ийца
Хамхой А. цӏерагӏча Гӏалгӏай Паччахьалкхен филармоне болхлой бахар Пригородни кхален Карца, дешархошта концертни программа гойта. Моттигерча культуран Цӏагӏа йоаржайир ашарий программа, из кийчъяьяр боахамашта юкъерча культуран-дешара «Культура дешархошта» яхача проекта чуйоагӏаш. Филармоне солисташа гойтар хоза кийчъяь ашарий оагӏув, цо дицлургдоацаш цӏай дир царна.
«Къонача хьажархошта хезар гӏалгӏай меттала дукха ашараш. Кӏанташанаькъан Жабраила «Сигалара чубоагӏа седкъа», «Аьрзи» яха иллеш аьлар, Долакханаькъан Зульфияс- «Нана–лаьтта», «Болама илли», Бӏарханой Заьлмахас - «Ма алла», иштта «Беламе илли», Хьоашаланаькъан Лолитас дӏааьлар «Са къам», «Йоагӏаргьяц» яха иллеш.
Концерт дӏахо дӏадихьар Акхасаганаькъан Мовсара «Боалий безам», «Эггара хозагӏа» яхача иллешца, ӏаьлаханаькъан Заирас «Гӏалгӏай», «Хоза йоӏ» яха иллеш даьхар.
Лирически иллеш хувцалуш дар беламерча гойтамашца. Дешархоша дегагӏоз хинна тӏаийцар артисташ. Цига цар таро хилар артисташ го, бовза, хозача ашарашка ладувгӏа», - аьлар «Сердало» газетага из болх вӏашагӏбеллараша.
Иштта кхетаченаш дӏахьош хилча, вай тӏехьен дог гӏоздоал, гонахьардар дикагӏа довз; цул совгӏа, гуш хул искусствос нах вӏашагӏтохаш хилар.
