Гӏалгӏайчен ГИБДД болхлочо дешархошца кхерамзлен урок гойташ болх бир
Гӏалгӏайчен Магӏалбика кхале дешархошца, наькъа бокъонаш царна йовзийташ хьехама болх дӏабихьар. Кхетаче хилар №12 йолча Инаркъерча ишколе, из яр «Кхерамзлен кӏира» яхача Россе юкъара болам дӏахьош хилара чуйоагӏаш. Цига берашца къамаьл де вера наькъа ха тӏарча бӏун командира гӏонча Кхоартой Ваха.
«Полицейскеша, берашца къамаьл деш, царна хьалхадаьккхар наькъа бокъонаш лорае езарах. Къаьстта терко тӏаяхийтар наькъал дехьабоалаш лоралуш хилара, гӏашлошта биллача наькъ тӏа гӏолла мара дехьацабалара, баьдеча хана къегаш бола гӏирс лелабара. Полице лейтенанта берашта дийцар наькъашкара хьал мишта латт, гӏашлошта ха дезаш дола из унзара хьал хьалхадаьккхар царна», - аьлар «Сердало» газетага Гӏалгӏай Республике гӏолла йолча Россе МВД.
Бераша а дукха хаттараш делар инспекторга. Уж дукхагӏа ха ловш бар къаьстта чоалхане моттигаш йолча хана наькъа дехьабалара хьал мишта нийса хила деза. Хӏара хаттар теркаме эцаш, царна жоп луш вар инспектор, ший балхаца цхьацца дола нийсденна хӏамаш дувцаш.
