Маьтсела бетта 1-ча денна хетадаьча концерте-митинге дакъа лаьцар РДНТ болхлоша
Бӏаьстенна, къахьегама Цӏайна хетаяь лоархӏаме кхетаче дӏайихьар Магасе. Моттигерча профсоюзий Федераце вӏашагӏъелла митинг-концерт хилар Коталон парке. Республикерча Къаман кхоллама Цӏен болхлой а бар цига дакъа лоацаш, цу моттига кулгалхочун гӏонча йола Котанаькъан Марем хьалха йолаш.
«Берригаш цхьанкхеташ цӏай хилар цох. Моттигера къахьегамхой даькъалабувцаш къамаьл дир майдан тӏа, йоккха концертни программа яр кийчъяьр. Цу юкъе дакъа лоацаш хилар Дошлакъий-Юртарча культуран Цӏен «Селаӏад» яхача вокальни тоабан доакъашхой Къоастой Самира, Шоанхой Хьава», - дийцар «Сердалога» РДНТ исбахьален оагӏонцарча балха кулгал деча Абдурзаканаькъан Аьсета.
Маьтсела бетта 1-ча дийнахьа дездер машара, къахьегама, паргӏатон лоархӏаме Цӏай да. Коталон парке эттача кхетачено дог айдаь бар берригаш.
