Коталон Ди хьатӏадоагӏаш, «Лоаман йиӏий майрал» яха спектакль гойтаргья мехка
«Лоаман йиӏий майрал» яха спектакль гойта кийчлуш ба берий театра актёраш. Сийлахь-боккхача Даьймехка тӏема Котало яьккха 81 шу дизара хетабаь ба из болх. Цо ювц вай къаман цӏихеза, деналах, майралах йиза хинна йоӏ Тутайнаькъан Аьсет.
Цӏихеза ӏилманхо, Гӏалгӏай мехкарча кхалнаха юкъера эггара хьалхара лорий ӏилмай кандидат йолаш къахьийга саг я из.
«Тӏом болабеннаб яха дош хьахезача, салташта гӏо де тӏем тӏа яха лаьрхӏад цо. Даьхен йизза йоӏ йолаш, деналах ца йохаш, хаьдаб цун вахара никъ», - дийцар «Сердалога» ТЮЗе. Спектакла режиссёр Ховтанаькъан Лейла я. Архивашкара бокъонца хинна хӏамаш юкъекхувлаш, вӏашагӏбеллаб из болх, цунга хьежжа тӏема истори довз хьажархошта.
«Лоаман йиӏий майрал» яхар духхьал театральни болх хинна ӏац; деналах, майралах йизза хинна гӏалгӏай йоӏ я цо ювцар. Чӏоагӏа лоархӏаме да из болх вай къонача тӏехьенна бовзар. Коталонга бодача наькъ тӏа доккхача гӏулакхашца белгалъяьннарех я Тутайнаькъан Аьсет.
