Техкар хьалувцаш латача яхьашка, дунен вице-чемпион хилар вай мехкарча спортсменах Пхьилекъонгий Султанах
Таджикистана столице укх деношка дIайихьача гуштингирех йолча дунен чемпионате, дото майдилг йоаккхаш, белгалваьлар вай спортсмен Пхьилекъонгий Султан. 65 кг дозал долча спортсменашта юкъе низ гойтар вай мехкахочо. Цу йоккхача яхье дакъа лоацаш вар дунен 70 мехкара 200 гаргга спортсмен. Из хоам «Сердалога» бера моттигерча Минспортера.
ГIалгIай спортсмена цу лоархIамеча яхье дикка аьттув баьлар ала йиш йолаш да тахан. Душанбе дIахьоча яхьашта хьакъоастадаь хинна ахча 400 эзар доллар дар, хьалхарча моттига – 20 эзар доллар, борза майдилг яьккхачун - 5 эзар доллар, хIаьта Пхьилекъонгий Султана дото майдилг яккхарах 10 эзар доллар ахча хьаийцар.
Белгалде деза, вай спортсмен дикка кийчо яь хиннилга, цунга хьежжа толамга кхачар а хилар. Пхьилекъонгий-Юртарча Берий - кагирхой спортивни ишколе кийчо еш хул из, Султиганаькъан Мухьмад тренер волаш. Дунен йоккхача яхьашка котало яккхарца даькъалавувц тахан спортсмен, иштта цун тренер.
