Гӏалгӏайчен спортсменаша Ерригроссийски тӏема говзала ловзарашка майдилгаш яьхар
Гӏалгӏайчен каратисташа дика толамаш даьхар Ерригроссийски тӏема говзала ловзарашка, цига цар яьхар дошо, дото майдилгаш. Спорта кхетаче - Хӏӏӏ яха Ерригроссийски ондаргий тӏема говзала ловзараш дӏахьош дар «Витязь» спортивни даькъ тӏа, Витязево курорта юрта. Укх шерара турнир йоккха хилар, цо чулаьцар 5000 совгӏа атлет. Уж бар Россе 60 моттигера баьхка спортсменаш, 22 спортивни тайпах совгӏаташ даьхар цига.
«Чӏоагӏагӏа бола спортсменаш гулбеннача яхьашка Гӏалгӏайчен тоабо массайолча кепара каратэ говзал гойташ, шоаш дика кийчо яь хилара тешал дир. Лакхарча коталон моттиге эттар Пхьиленаькъан Мухьмад. Из тешшаме котваьлар, 80 кг дозал долаш, 16-17 шу даьннарел. Республикан цхьаькха майдилг ера Шовланаькъан Илеза. Цо яьккхар 14-15 шу даьннарашта юкъе кхоалагӏа моттиг, 54 кг дозал долаш», - аьлар «Сердало» газетага Гӏалгӏайчен спорта Министерстве.
Къонача чемпионий толамашта тӏехьа цар хьехамчий боккха къахьегам латт. Из толам баккха таро хилар цу яхьашка начӏал дола тренераш хиларах - Шовланаькъан Ӏаддал-Ӏазит, Иленаькъан Илез.
