Наьсаре базар тӏа хинна къовсам, уголовни гӏулакхаца чакхбаьлар
Наьсаре «Фабрика» оалача базар тӏа хинна къовсам, чакхбаьлар уголовни гӏулакхаца. Моттигерча лоткъам эцача болхлоша уголовни гӏулакх хьадийллар, дов даьннача хана шийца къовсаме ваьннача сагах латарах. Лорий экспертиза яьккхачул тӏехьагӏа, чов яь хилар белгалдир.
«Карарча шера, тов бетта 6-ча дийнахьа, ИРКБ хоам бир Наьсаре гӏолла йолча Россе ОМВД ха деча даькъ тӏа, травматологически отделене травматически герз кхийтта, аьтта ха лозадаь саг дарбанче варах. Уголовни тохкама болхлоша, сиха тохкама болх дӏахьош лаьца, из зулам даь саг полице хьачувоалавир. Из хилар хьалха наркотикаш бахьан долаш (РФ УК 228 ст.) лаьца ваьлла. Полице цунгара лоткъам ийцар, цӏаьхха, дов даларах, шийца къовсаме ваьннача 39 шу даьннача сага чов еш дола МР-79-9 МТ. 9 калибра герз теха хилар тӏаийцар цо. Ше раьза волаш, герз хьаделар»,- аьлар «Сердало» газетага республикан МВД зарбан болх лелабераша.
Наьсаре гӏолла йолча Россе ОМВД болхлоша цунна духьала уголовни гӏулакх хьадийллар. Из лоархӏаш да Россе Уголовни кодексах (пункт «в» 2 дакъа 115 ст.). Цу статьях из бехктокхаме озаргва цо чов ярах, герз леладарах.
