Бразильски джиу-джитсу латарах толамаш доахаш ва ИнгГУ студент Гаьгенаькъан Ӏалихан
Халкъашта юкъерча яхьашка ший спортацара говзал гойташ хилар Гӏалгӏай паччахьалкхен университета юридически факультета 1-ча курса студент вола Гаьгенаькъан Ӏалихан. Гран-при WAYBJJ лоархӏамеча яхье 70 кг дозал дарашта юкъе шоллагӏа моттиг йоаккхаш белгалваьлар из.
«Лакха говзал йола, дикка кийчо яь спортсмен ше волга дӏахьекхар цига вай мехкарча студента. Бразильски джиу-джитсах дола мора тӏехкар луш белгалвир Гаьгенаькъан Ӏалихан. Цу дерригнена тӏехьа кийчо еш, къахьегаш доадаь дукха денош, сахьаташ латт», - йоах «Сердалога» тахан бенача хоамо. Спортацара кхоачарле дикка чӏоагӏъяь ва студент.
Бразильски джиу-джитсах йолча спорта говзанча ва из, кхы а дукха толамаш да цун спорта исторе. Ӏалихан дунен 4-зза чемпион ва, Европа 5-зза чемпион, Россе 6-зза чемпион ва. Лакха начӏал долча къонача спортсмена никъ дӏахойодача хана а, толамаш долаш хилба ала лов!
