Ерригача Россе кагирхой кхетаче дакъа лоацаш я ИнгГУ студентка
Ерригача Россе «Кхоанен ӏилма- къонабарий ӏилма» яхача кагирхой Xӏ ӏилман кхетаче ший вуз дӏайовзийташ хургья Гӏалгӏай паччахьалкхен университета химико-биологически факультета пхелагӏча курсе дешаш йола Йовлой Жанетта. Нижегородски паччахьалкхен Къаман тохкама университете дӏахьош ба тахан из боккха болх.
«Студентий, аспирантий ӏилма-тохкама балхех йолча Ерригача Россе яхьашка хьалхабаьннарашта юкъе я вай мехкахо. Цун проекта тема ювзаенна я химически наькъаца керда хӏама кхолларца. Ший тохкама балхах йола доклад йийшар цига студенткас», - «Сердалога» из хоам бера ИнгГУ зарбан болх лелаберашкара.
«Кхоанен ӏилма-къонабарий ӏилма» яха кхетаче хӏара шера дӏакхухьаш я Россе йоккхача университеташка. ӏилман итт оагӏув юкъелоацаш болх ба из, цу юкъе я цӏихезача ӏилманхой лекцеш, семинараш, гойтама балхаш.
Къаьстта терко ю кхетаче ӏилман хӏама доаржадара. Таханарча ханацара дуккхадараш дашха, лоархӏемеча хаттарашта жоп лаха, йоккхий проекташ йоаржаярца дувзаденнараш ма дарра довза аьттув ба гулбеннарий.
