ӏилман балхех йолча Ерригача Россе яхьий тӏеххьарча жӏака тӏа кхаьчай ИнгГУ студентка
ИнгГУ химико-биологически факультета «Фундаментальни, прикладной хими» яхача оагӏонца дешаш йола студентка Йовлой Жанетта Ерригача Россе ӏилман-тохкама балхех йолча яхьашка дакъа лоацаш я тахан. Из хоам «Сердалога» бера университетера.
Гӏалгӏай студенткай ӏилман хетабаьча химически реакце наькъаца цхьа хӏама кхыча хӏаманга далара наькъа хетабаьча балха цӏи дикка чоалхане я. Экологеца, промышленностаца чӏоагӏа лоархӏаме бола углеродацара болх ба вай мехкахочо кийчбаьр.
Тов бетта 22-25-ча деношка Лохерча Новгороде хургья яхьаш. «Кхонен ӏилма - къонабарий ӏилма» яхача Ерригача Россе кагирхой Xӏ ӏилман кхетаченга гӏолла дӏахьош ба из болх. Россе дешара гӏулакхех йола министерство я цу гӏулакха хьалхаэттар.
Российски цӏихезача ӏилманхошта ший болх дӏабовзийташ хургья вай мехкахо.
