Ӏаддалхой яхьаца къамий цхьоагӏон Ди дездеш хилар ИнгГУ студенташ
Къамий цхьанкхетара Денна хетаяь яхь дӏахьош, ӏадсаькх кхувса арабаьлар вай паччахьалкхен Университета студенташ. Вуза тайп-тайпарча факультеташкара къонабараш бар ше-ше котвала, меттахьа тоха гӏиртараш. Физически кхетамах йолча кафедрас, ИнгГУ спортивни студенчески клуба доакъашхоша вӏашагӏбелла болх бар из; Магасерча культурах, спортах, туризмах йолча моттиго хьаллоацаш. Къовсама керттера декхар къонабарашта юкъе вай къаман ӏадаташца бувзам бола ӏадсаькх деттара говзал йоаржаяр, тахан кхувш латтарашта ма хулла из дезадалийтар дар.
«Сердалога» цу моттигера бенача хоамах, яхь кхаь оагӏонца дӏайихьар. Доакъашхой хьаллаца гулбеннабар лоархӏаме хьаьший, царна юкъе бар вай мехкарча ӏаддалхой Федераце президент Йовлой Анзор, «ШодСанЛат» Федерацена хьалха латта Сукенаькъан Мухьмад-Гири, Магасерча культурах, спортах, туризмах йолча моттига кулгалду Къоастой Ибрахӏим.
Кагирхошта юкъе хьалхара моттиг физико-математически факультета студент волча Вахаранаькъан Або-Бакаро яьккхар, шоллагӏча моттиге эттар цу факультета студент Хазанаькъан ӏаьла, хӏаьта кхоалагӏа моттиг юридически факультете дешаш волча Султиганаькъан Мухьмада елар.
Мехкарашта юкъе дошо майдилг педагогически факультета студент йолча Цхьорой Далена елар, дото майдилг йоаккхаш белгалъяьлар цу факультета студентка Цхьорой Хьава, хӏаьта кхоалагӏа моттиг яккхарах йола борза майдилг лорий факультете дешаш йолча Гарданаькъан Сафияйна ӏоэллар цу дийнахьа. Майдилгаш, грамоташ, кубкаш дӏайийкъар котбаьннарашта.
Цу оагӏонцарча Федераце белгалдечох, студенташта юкъе ӏадсаькх деттара спорт йоаржаяр дикка пайда беш да тахан. ИнгГУ дийцачох, къонабарашта геттара чӏоагӏа дезаденна гӏулакх да из. Яхьашта боаггӏача боараме кийчо е, из говзал дикка шаьръе студентий аьттув хургболаш; эшаш мел болча кхоачамца тоаяьй из секци университета кулгалхоша.