Мехкарча керттерча музеера болх бовзаш ба ИнгГУ студенташ
Гӏалгӏай паччахьалкхен университета исторически факультете дешаш бола студенташ Малсаганаькъан Тухана цӏерах йолча мехкарча музее ха дӏахьош, цигара болх бовзаш ба. Къонача тохкамхошта чӏоагӏа лоархӏаме да тахан из гӏулакх. Музея архивашкара хӏамаш довзаш, шоай дешарца шоашта накъадаргдар ӏомадеш ба студенташ. Керттерча музее къаман истори ма дарра довза аьттув ба цар.
«Музея залашка гӏолла экскурси дӏайихьар студенташца. Къаман ӏадаташца, культураца, доккхача истореца, къаьнарча ханашца дувзаденна хӏамаш дайзар студенташта музее. Иштта цига къахьегарашца къамаьл хилар цар. Къонача историкашта чӏоагӏа лоархӏаме да из гӏулакх, хӏана аьлча шоаш хьаийцача наькъага хьежжа къаман истореца дувзаденна мел дола хӏама довза дезаш ба уж. Музее къахьегаш йолча Местой Заретас, ӏилман болхлочо Гойганаькъан Розас музеерча гӏирсех, уж дерригаш лорадара наькъах дийцар царна», - йоах «Сердалога» музеера кхаьчача хоамо.
Музее гӏолла гобоаккхаш, цу чура вахар довзаш хилар тахан шоай дешаре, иштта кхоана балха тӏа накъадаргда къонабарашта. Ма хулла дукхагӏа довзар цар гӏулакха пайда бахьаш хургда.
